في احوال المغتربين السودانيين!!

إذا كنت راكب جيب برادو ولافي عمة كبيرة وشايل جوال غالي الثمن وتتجدع في شوارع واستراحات الرياض وجدة فأنت سوداني ظاهرك غنيا وباطنك غرقان في التقسيط إلى أذنيك .

إذا كنت زول شاطر في مهنتك ومعاك مؤهلات حلوة وما لاقي شغل كويس رغم مرور عشرة سنوات على اغترابك ، معناها أنت سوداني ينطبق عليك احد أمرين ( أما انك شين ومبشتن وشكلك ما سياحي ) ومافي زول هضمك أصلا عشان ينظر لشهادتك أو أنك مسكين وعبيط وما بتعرف تقدم نفسك في عالم الـ malt nationality وفي الحالتين بنصحك بالعودة فورا إلى بلدك يمكن تلقى ناس تفهمك وتقدرك .

إذا كان عمرك عدى الأربعين سنة وراتبك لا زال بين 3.000 إلى 5000 ريال فأنت إذن سوداني مفلس وغرقان في الديون وبوضعك ده حا تغرق زيادة ومش حا تقدر تعمل حاجة في سودانك الغالي البقوا ناسوا يتكلموا بالمليارات ده ، وبالتالي لا اتوقع أن تتمكن من العودة إلى بلدك مدى الحياة وستموت وأنت على هذه الحالة. " الله يعينك "

إذا كنت قاعد عزابي وعائلتك ليست معك تأتيك فرادى وجماعات في أكثر من مرة في العام الواحد وكل ما يجي واحد من عائلتك بجي معاه قائمة طلبات أهمها تغيير الجوال وشراء لاب توب بدل السرقوه منو في الداخلية فأنت سوداني متوفر منه عدد كثير من النسخ ومغلوب على أمره وينتمي إلى شريحة متنامية وفي ازدياد مضطرد وكل يوم يتم اكتشاف ( مودلز ) جديدة منه.

إذا كان عمرك بلغ الستين أو أوشك وبناتك أتزوجوا وأولادك أتخرجوا من الجامعات ولا زلت قاعد في الغربة ، معناها أنت سوداني يائس من تحسن الوضع في السودان وغير قادر على التأقلم معه والعيش فيه بنمطه الحالي والغربة جرت في دمك بسرعة 360 كيلو متر في الساعة وأنخفضت الى 40 فقط تجاه وطنك وتفضل قضاء بقية عمرك متغرباً عن وطنك ومتقربا لله في مساجد السعودية الفخمة مستفيدا من سهولة وتوفر أجواء العبادة والعمل للآخرة، وغالبا ما تكون ليس من ذوو الطموحات المادية ومكتفي بان تعيش مستور الحال إلى أن تلاقي ربك .

إذا كنت مغترب من أوائل الثمانيات وكنت شغال في الحكومة وحضرت فترة الطفرة الخليجية وانتقلت الآن للقطاع الخاص بعد سعودة وظيفتك التي قضيت بها ما يقرب من ثلاثون عاما واشتغلت في شغل اقل من شغلك الأسبق بكثير وراكب عربية هكرة فأنت سوداني جسور وصبور ونبيل بس تخطيطك الاقتصادي تعبان شوية لأنك مفروض تكون راقد في الضل بعد هذه الرحلة الطويلة ولكن ربما تكون عند الله أفضل من الكثيرين .

إذا كنت ليك سبعة سنوات ما نزلت إجازة رغم مناشدات اهلك لك للحضور حتى لو أيد وراء وايد قدام على الاقل لمقابلة والدتك المريضة وزوجتك "حامياك " تمشي لوحدك بحجة خوفها من أن تتزوج عليها والميزانية غير كافية لسفر جميع أفراد أسرتك ، وسرقك الزمن حتى جاءك خبر وفاة والدتك ونفس الظروف منعتك من السفر للبكاء فأنت سوداني ميؤس من حالتك وعليك تغيير أسلوب حياتك عشان ما تجلي من الدنيا والآخرة معا .

إذا كنت محمول ومليان أطفال إلى أضنيك ومزنوق على مدار العام ورغم ذلك كل يوم تهدد زوجتك بأنك إذا الله أداك رزق حا تعرس فوقها رغم تحملها لفقرك وضنك الحياة معك فتأكد من انك شخص جاهل وأناني ولن يفتحها الله في وشك مدى الحياة بسبب ظلمك لهذه المسكينة العايشة معاك على الحلوة والمرة ومتحملة ( ؟؟؟ ) .

إذا كنت كل إجازة بتنزل مع نسابتك وتقضي معهم معظم إجازتك وتزور اهلك في البلد لمدة يومين بس وتشيل هدايا لنسابتك أغلى وأكثر من التي تحملها لأهلك وكل سنة أو سنتين بتعمل زيارة لي نسيبتك ولم تعمل زيارة لامك سوى مرة واحدة فقط فأنت إنسان مهروش ومغلوب على أمرك ورافع الراية ومصيرك سيكون صعب بعد أن تعجّز وتنزل المعاش ويروح بريق الشباب والقروش وتترمي رمية الـ ( ؟؟؟؟ ) .

إذا كنت من النوع البغير شرائح جواله كثير وله عدة أرقام معظمها لا يمكن الوصول إليه حاليا فأنت أما انك شخص مديون من عدة جهات وغير جاد في التسديد ولا تملك القوة والصراحة والمصداقية والجدية مع الدائنين وتتهرب منهم بعدم الرد وتغيير الأرقام ، أو انك شخص تنتمى لعائلة ممتدة مطلبية وفاكرنك شغال نائب رئيس الدولة المغترب فيها وشغالين طلبات لو ضاعفوا راتبك عشرة مرات ما بتقدر تكفيها وأنت غارق في الحلم وما قادر تكشف وضعك الحقيقي وتعترف لهم بأنك موظف بسيط ودخلك مش مكفي عيالك بدلا عن الزوقان والتهرب وفي الحالتين تبديل الشرائح ما بحلك.

إذا كنت من النوع الببدأ مع المدام في شراء الهدايا لإجازة الصيف منذ فبراير وتبدأ الرحلات المكوكية اليومية لكافة الأسواق ومقاسات وتطقيم وعطلة لأجل الأولاد وأخوالهم فقط فأنت سوداني كلاسيكي وما عندك شغلة ومرتك كلاسيكية اكترمنك حيث عفا الدهر عن مثل هذه الأمور وانك لم ترتدع من العبارات الجارحة التي تسمعها كل اجازة مثل ( الدلاقين دي هنا زاتها بقت رخيصة ) بتتعبوا تجيبوها كل سنة لينا لي شنو ؟؟؟.

إذا كنت خاتي كل حصاد غربتك في بيت متواضع في الشجرة أو الدروشاب أو أي حي شعبي بالعاصمة ومخليه لاختك تسكن فيه بدون ايجار كمساعدة لها وعندما ذهبت في اجازة مرافقا لابنتك المقبولة في الجامعة كي تسكنها في بيتك مع اختك تفاجأت بأن اختك اجرت البيت لصالحها ورجعت سكنت في البلد بدون اذنك والمؤجرة طردتك من بيتك ومشيت سكّنت بنتك في داخلية غالية التكلفة وما قدرت تسأل أختك من تصرفها فأنت سوداني ويا حليلك كمان الله يكون في عونك

الموضوع الأصلي: في احوال المغتربين السودانيين!! || الكاتب: عمار تاج السر || المصدر: منتديات قبة سليم

www.gobbatsaleem.com

كلمات البحث

قبة، قبه، سليم، منتدي، منتديات

- الحمدلله يا عمار ؟
- نحن بره وبعيييييييييييييييد ؟
- لكن ؟ كل الحالات سأأأأأأأأأأأأأأاابة ؟
- وأنصحك أنتا وباقي الشباب ؟ أوع تكونوا من
الأنواع دي ؟
- شدو حيلكم وأتخارجو بدري بدري ؟
- تحياتي -

الاستاذا فاروق التحية :

أها حتي ناس اورباء تأكد يأخي ينطبق عليه أسوء من كدة فلهمة و ديون مش فلس ...

الحبيب ابو الهول
وصف دقيق لاحوال المغتربين ما يخر المويه لكن كيف الطريق الى الخلاص من هذا الوحل يا حبيبنا والله المخارجه صعبه بشكل لا يمكن ان تتصوره فالمغترب يموت مرتين مره بنيران الغربه ومره اخري بالبعد من الاهل والاحباب ومره ثالثه احتمال عودته دون تحقيق ما يصبو اليه وطبعا دي الضربه القاضيه والتي لن يفوق منها ابدا والله المستعان وارجو ان نكون جميعا بعيدين من هذه الثالثه ,,,,,,,,,

ود الشيخ عبدالله قاسم
اعلام الرياض

نعم المغترب زي العربات الكورية
تخدم تخدم وفي النهاية تترمي خردة
لكن الزول البنظر ده لو كان عرف نحن طلعنا ليه ماكان قعد ينظر قدر كدة
ما يهو في السودان في ناس معاهم ماجستير من جامعة الخرطوم وبتقدير ممتاز وما لاقين شغل
وبعدين سودان شنو الناسو بيتكلموا بالميارات
الناس الراقدة قدام مستشفى الذرة وفارشين اشجار النيم وحاطين الطوب تحت راسم ديل ما سودانيين
البنت الجامعية الكانت بتاكل من الكوشة، ماكانت سودانية
هو عمر البشير ذات نفسو لو ماكان اغترب في الإمارات ما كان بقى رئيس
الدولة ذات بقت ماشة بقروض دول الخليج/ شي بحرين وشي الكويت وشي قطر واخرها السعودية
يا جماعة خلوها مستورة، لانو والينا زاتو الايامات دي هنا لافي بيفتش في الشرتيت.

كل التقدير للاخوة المتداخليين :ابو الهول -شريف-عبدالله قاسم-جزولي

بس بصراحة الموضوع اتطرق للاسف لحالنا المايل بكل شفافية بغض النظر عن سوء احوال السودان وحتى الظروف الصعبة هناك ما ليها اي دور عن الحاصل للمغتربين
المغترب السوداني للاسف(( الغالبية العظمى)) لا تخطط للمستقبل بواقعية بل نعيش الغربة بدون هدف واضح وتضيع في السنين والعمر..و اخرشيء نندب في الحظ والسودان والمشاكل التي تواجهنا والتزامتنا
ووو....ووو واسباب ما ليها اول من اخر... بس بصراحة السبب هو تركيبة الشخص السوداني التى تفتقد للواقعية والحكمة في تسير امور حياتها...
وحتى حال السودان وما وصل الية هو نتاج اخلاق وتركيبة الشعب السوداني الفضل....لانو البيحكمو ديل جو من وووووين.. مش سودانييين.... وبرضو سوداني وخليك سوداني